රුසියාවේ ජාතික කවියා ලෙස මෙන්ම නූතන රුසියානු සාහිත්‍යයේ පීතෘවරයා ලෙසද හදුන්වන ඇලෙක්සැන්ඩර් සර්ජිවිඩ් පුෂ්කින් ඔහුගේ කළු ජාතික සම්භවය හේතුවෙන් රුසියානු සාහිතයයේ කළු පීතෘවරයා ලෙස ද හැඳින්වේ.
රුසියාවේ කාලයක් අධ්‍යාපනය හැදෑරූ මා එකක් හොදින් දනිමි. රුසියානූ කළු සම ඇති අයට ප්‍රිය කරන්නෝ නොවෙති. විශේෂයෙන්ම මොස්කව් නගරයෙන් පිට පලාත් වල කාල වර්ණ සම ඇති අයට මෙන්ම කහ පැහැ සමක් ඇති ආසියානුවනටද රුසියානුවන් අතින් හිරිහැර සිදුවූ අවස්ථා අපට නිරන්තරයෙන්ම අසන්නට ලැබෙයි. ඒ නිසාම විශ්ව විද්‍යාලයේ ඉගෙන ගන්නා කාලයේ වුවද අප රාත්‍රී කාලයේදී හොස්ටලයෙන් පිටතට ගියේ නැත. පිටතට ගියත් ඒ අවස්ථා අවම විය. වරක් දෙවරක් අප රුසියානුවන් සමග “පිහි සටන්” කල අවස්ථාද ඇත. එවන් එක් සටනකදී මගේ මිතුරෙකු පිහි ඇනුමකින් තුවාල පවා ලද්දේය.
ඒ කෙසේ මුත්, අප්‍රිකානූ සම්භවය නිසාවෙන් කැරළි ගැසුනු කොන්ඩයකින් යුක්ත වූ පුෂ්කීන්ට රුසියානුවන් තුල ඇත්තේ ඉමහත් ගෞරවයකී. ඔහුගේ පිළිරූ රුසියාවේ පාසැල්වල, පුස්තකාල, සහා මහා මාර්ගයේ තැන් තැන්හී පවා අනන්තවත් ඉදිවී ඇත.
පුෂ්කීන්ගේ මුත්තා වන ඒබ්‍රම් පෙට්‍රෝ රුසියාවේ මහා පීටර් රජුට ත්‍යාගයක් ලෙස එවනු ලැබූ අප්‍රිකානු වහලෙකී. එහෙත් ඔහු පසුකාලිනව ජෙනරල් වරයෙකු වශයෙන් පත් වූ නිසාම එතැන් සිට ඔහුව වංශවත් කරනු ලැබීය. යුධ ජයග්‍රහනයන් සහා ඒවායින් ලද උසස් වීම් නිසාම ඔහු තම වාසගම “ගැනීබල්” ලෙස වෙනස් කොට ගත්තේය. “ගැනීබල්” යනු ඉංග්‍රීසී භාෂාවේ “හැනීබල්” යන්නෙහි රුසියානු පරිවර්තනය යැයි සැලකෙයි.
වහා කුපිත වන ස්වභාවයේ මිනිසෙකු වූ පුෂ්කීන් Live by the pen, die by the sword යන කියමන ඔහුගේ ආදර්ශ පාඨය කොට ගත්තේය.
ඔහු ද්වන්ද සටන් සදහා දැඩි නැබුරුවක් දැක්වීය. ඒ නිසාම ඔහු තම ප්‍රතිවාදීන්ව ද්වන්ද සටන් සදහා අභියෝග කල අවස්ථා ගනන 29ක් විය. එහින් බොහෝමයක් ඔහුගේම මිතුරන්ගේ මැදිහත් වීමෙන් වලක්වා ගත හැකි වුවත්, තම බිරිදගේ අනියම් සම්බන්ධතාවයක් මත ඇයගේ පෙම්වතා සමග කල ද්වන්ද සටනකින් පුෂ්කීන් අඩු වයසින් මිය ගියේය.
එවිට ඔහුගේ වයස අවුරුදු 37කි.
පහතින් දැක්වෙන්නේ ඇලෙක්සැන්දර් පුෂ්කීන් මහා කවීයාව මිහිදන් කොට ඇති එස්ටෝනීයානූ දේශ සීමාවට ආසන්නව Pskov වල පිහිටි Svyatogorskiy (Saint-Mountains) monastery නම් වූ ඔහුගේ පවුලේ සුසානයයි. දිනෙක රුසියාවට ගියහොත් යන්න එහි ඇති පුෂ්කීන් ස්මාර්කය බලන්න.
– මුතුමුදලිගේ නිශ්ශංක
