ලාංකීය ගීත කලාවට ගීත රැසක්ම දායාද කළ ගීත රචිකාවක් වන නදීරා රෝෂිණී නල්ලපෙරුම ගීත රචිකාවක් පමණක් නොවේ. ඇය කාව්‍ය රචනා, නව කතා හා කෙටිකතා යන සියලු කලා අංගයන් වල තම නිසඟ හැකියාවන් කියාපෑ නිර්මාණ වේදිනියකි.”සඳ වැඳීම”,”අන්තිම කඳුළු බිංදුව”, “මන්දාරම් නුවර”, “මල් පිපෙන්නැති නුවර”, “රාත්‍රිය එනතුරු”, “හඳ ඇවිත් හද පාරන” යන කාව්‍ය රචනා හයක් ද, “මගේ හීන” ගී පද රචනා කෘතියද “හිස් දෑත්” කෙටිකතා සංග්‍රහය ද “සංසාර පුරුද්දට ආවා” නවකතාවෙන් ද ඇය සිය සාහිත්‍ය ගමන් මග එළිය කරගෙන ඇත. විවිධ කලා අංගයන් ගෙන් පුළුල් නිර්මාණ පරාසයක ඈ සිය ප්‍රතිභාව දක්වා ඇත. ඇගේ සියලු නිර්මාණ තුළින් දුටු සුවිශේෂී ලක්ෂණය වන්නේ මානව ප්‍රේමය මුල් කරගෙන නිර්මාණ හැසිරවීමයි .
2015 වර්ෂයේ දී එළි දැක්වූ හඳ ඇවිත් හද පාරන කාව්‍ය සංග්‍රහය ඇයගේ කාව්‍ය නිර්මාණ අතර මා සිත් ගත් කාව්‍ය සංග්‍රහය වේ. එය ඇයගේ කාව්‍යකරණ ජීවිතයේ නව පිටුවක් පෙරලීමට සමත් ව ඇති බැව් මට සිතේ. එහි එන කාව්‍ය රචනා සිංහල දෙමළ සහ ඉංග්‍රීසි යන භාෂා ත්‍රිත්වයෙන්ම ඉදිරිපත් කර තිබීම මෙහි ඇති සුවිශේෂී බවකි . මානව දයාව මුල්කරගෙන කාව්‍ය රචනයේ යෙදෙන ඇය එදිනෙදා ජීවිතයේ අපට හමුවන සමහර සන්සිද්ධීන් ද ප්‍රේමය, වියෝගය යන යන තේමා ද මුල් කරගෙන කාව්‍ය රචනා නිර්මාණයන් සිදු කර ඇති බව පෙනේ. සමහර අවස්ථාවල වෙනත් කවීන්ට හසු නොවූ කාව්‍ය තේමා එහි අන්තර්ගත වීම විශේෂත්වයකි. සිය අත්දැකීම් මෙන්ම සමාජයේ පවතින විවිධ වූ සංසිද්ධීන් සංවේදී බවකින් යුතුව කවියට නැගීමට කිවිඳිය සමත්ව ඇත.
හඳ ඇවිත් හද පාරන කාව්‍ය සංග්‍රහයේ එන පහත කවිය සිත් ගත් කවි අතර වේ.
බිම් මලත් පුදසුනට යා යුතුය
ගිම්හාන සාය මත
ඇද වැටෙන පිනි බිඳට
ගඟක් සේ
දෙතොල තෙත් කළ හැකිය
අමාවක මැදියමක
පිපුනු තනි තරුවකට
සෙනෙහසින්
සරා සඳ වුව හැකිය
සෙනෙහසේ මහා බැඳුම්
නොදුන්නත් මියුරු ඵල
වසන්තය
සදා හිමි වූ ලෙසින
සම්මතය බිඳ දිනෙක
මල් ලොවේ මල් අතර
බිම් මලත්
පුදසුනට යා යුතුය ..
සමාජයේ මිනිසුන් අතර ඇති අසමානතා පිළිබඳව සන් කරමින් ඇය විසල් කතාන්දරයක් මේ කවියෙන් කියාපායි.
එසේම ජාති භේද පසෙකලා මානව ප්‍රේමය පිළිබඳව හැඟීම් වපුරන පහත කවිය ඇය තුළ පවතින මානුෂීය ගුණාංග පිළිබඳව මොනවට කියාපායි .
වැළඳ ගමි උඹ සතුටින
නිමිත්ත: සිංහල බසින් අත්සන් කළ ද්‍රවිඩ සොහොයුරෙකුගේ ගුවන් ගමන් බලපත්‍රය දුටුවෙමි .
ඉංග්‍රීසියෙන් පැරදුන ලියු ලියු අකුර
වැරදුණ
සිංහල ම හුරු උන දුටිමි නුඹ මව්බස
පැටලුන
සිහළුන් අතර ඉපදුන දෙමළෙකු බැවින් තනිවුණ
දිනූ බිමට බර වැඩි උන නිසා නුඹ දුර යන්න සැරසුණ
සිනහවත් විකසිත වුණා වත්තෙහි අහිතක් නොතිබුණ
එහෙත් අසරණ නෙත් කොන දුටිමි කඳුළක් සැඟවුන
මහා යුද්ධයක් නිමවුන සාමයේ ධජ
එසවුන
ඒත් සැනසුම කොහි වුණ උන මට මෙන් උඹට නොලැබුන
රුදු කුරිරුකම් රජවුණ දුක් කදුල උරුමය වුණ
සිංහල ද දෙමළ ද මොන දුක එකය අප විඳ වන
කල් ගෙවා දින ගනිමින එක මව් තුරුල හිමිවන
පින් බිමක ඉදි වෙන හිනාවෙමු අප
හෙට දින
ආයුබෝවන් කියමින නුඹ ම’වෙත එන
මතු දින
වනකම් කියමින කියමින් වැළඳ ගමි නුඹ සතුටින…
නදීරා රෝෂිණී නල්ලපෙරුම කිවිඳියගේ කාව්‍ය බස හැසිරවීමේ සරල බස් වහර නිසා එම කවි ඕනෑම දැනුම් මට්ටමක සිටින පාඨකයකුට සමීපව ඇසුරු කළ හැකිය .සමහර අවස්ථාවල ඇගේ කවි බස හදවතට ආමන්ත්‍රණය කරන සංවේදී භාෂාවක් වේ .
වළ දමනු මැන මා
වළලා දමනු මැන මා පිණි බිංඳු හිනැහෙන
සීතල තණ පලස යට හරිත තුඟු තුරක් ලඟ
දුක් විඳින මිනිසුන් එක්රැස්ව මොහොතකට
හිනැහෙන හඬ ඇසෙන මානයක
ලිපේ ගිනි මොලවන්න හදේ ගිනි මිල කරන
ගැහැනියක සුසුම් රැළි තැවරෙනා මානයක
හෙට දිනේ ජයගන්න ඇල්මෙන් අකුරු සොයනා
දරුවන්ගෙ කතාබහ දැවටෙනා මානයක
මව් ඇකයේ තුරුලුවී බිඳෙන් බිඳ කිරි උරන
පැටවුන්ගෙ කිරි සුවඳ ළය පිරෙන මානයක
කම්හලේ, ගොවිපළේ ,වැඩ බිමේ වෙහෙසෙනා
උන්ගේ දාබිඳු බලය ඉතිරෙනා මානයක
හඳේ එළිය පුරුදු ලෙස ගලා විත් හුදෙකලාවේ රැඳෙන
මගේ දුක්බර දෑස සිප ගන්න මානයක
වළ දමනු මැන මා
දුප්පතුන් නැති
සෝසුසුම් නැති ලොවක
යළි අවදි වන හීනයක….
ඇය ප්‍රාර්ථනා කරන යහපත් ලෝකය අපගේ පොදු සිතුම් පැතුම් වලට වඩා වඩාත් ආසන්න බව පෙනේ. ජරාජීර්ණ සමාජයක තැලී පොඩිවන මිනිසුන් උදෙසා ඇය කවි බසින් ඉල්ලා සිටින්නේ යහපත් ලොවක අවදිවන සිහිනයකි . දරුවන් වෙනුවෙන් යහපත් වටපිටාවකි. දුප්පතුන් නැති සෝ සුසුම් නැති ලෝකයකි .
විවිධ කාලවලදී පල වූ ඇයගේ සියලු කවි පොත් කියවා අවසන් වූ පසු කිවිඳිය බොහෝ කවි වලින් ඒවා කියවන පාඨකයාව යහපත් ලෝකයක් වෙත කැඳවා යාමට ප්‍රේරක සපයයි .ඈ තුළ පවතින ආදරය ,දයාව, කරුණාව සහ මානව ප්‍රේමය පිළිබඳව ඇති හැඟීම් කවි වලින් බොහෝ විට එළියට එයි .එසේම ප්‍රේමය මෙන්ම විරහව ද පොදු විඳීම් ලෙස කවි වලට නංවා ඇත.
එකී සියලු කවි තුළ ජීවත් වන්නේ අපේ යටි හිත් බව විටෙක හැඟේ.
කිවිඳියගේ නවතම කාව්‍ය සංග්‍රහයක් සහ ගීත කිහිපයක් ඉදිරියේදී එළිදැක්වීමට නියමිතය. ඇගේ සාහිත්‍ය ගමන සාර්ථක වන්නටත් අලුත් නිර්මාණ තුළින් පාඨකයා පින වීමටත් හැකියාව ලැබේවායි ප්‍රාර්ථනා කරමි.
චමිලා මැණික්ගමගේ
