වයස 27 ක ජේක් පෝල් සහ මයික් ටයිසන් අතර තරගය

ලොවක් බලා සිටි ජේක් පෝල් සහ මයික් ටයිසන් අතර තරගයෙන් 27 හැවිරිදි ජේල් පෝල් තරගය ජය ගත්තා.
ඒ විනිසුරු තීරණයෙන්.
එය බලාසිටීමට අපහසු වූ තරගයක්. ඒ බොක්ෂිං වලල්ලේ හිටියේ ලොව එතෙක් දැන සිටි, සුපුරුදු මයික් ටයිසන් නොවෙයි.
පැහැදිලිවම ජේක් පෝල් ඉදිරියේ අසරණ වූ වයෝවෘද්ධ මහල්ලෙක්.
එක්තරා අන්දමකින් තරගය පිටපතකට ක්‍රීඩා කෙරුණු එකක් ද විය හැකියි.
මන්ද මේ විනෝදාස්වාදය උදෙසා සංවිධානය කරන තරග බොහෝ විට ක්‍රීඩා කෙරෙන්නේ තිරපිටපතකට අනුවයි.
අනෙක් අතට බොක්ෂිං වැනි ක්‍රීඩාවක වයස විශාල බලපෑමක් සිදුකරන සාධකයක්.
වේගයට, පහරක ජවයට සහ ප්‍රතිචාර දැක්වීමේ හැකියාවට වයස විශාල ලෙස බලපානවා.
මයික් ටයිසන් සිය තරුණ කාලයේ මිලියන ගණනින් ඉපැයූවත්, මුදල් කළමණාකරනයක් නොතිබූ ක්‍රීඩකයෙක්.
ඔහු මේ ජීවිතයේ සැඳෑ සමය ගෙවන්නේ ආර්ථික අපහසුතා මැද බව අසත්‍යක් නොවෙයි.
එවැනි මොහොතක ඩොලර් මිලියන 20 ක් වැනි මුදලකට ඔහු සිය කීර්ති නාමය ලංසු තැබීම ද විය හැක්කක්.
තරගයට පෙර 58 හැවිරිදි මයික්, ජිමී කිමල් ගේ වැඩසටහනට පැමිණියා.
එහිදී ජිමී අපූරු කතාවක් කිව්වා.
මයික් ටයිසන් අපගේ වීරයෙක්. ඔහුගේ තරුණ කාලයේ ලොව බිහි වූ භයානකම බොක්ෂිං ක්‍රීඩකයා ඔහු.
එම නිසා සිය පරම්පරාවේ, “මැදි” වයසේ සිටිනා පිරිස් ඔහුගේ ජයග්‍රහණය බලාපොරොත්තු වෙන බව ජිමී මයික් ට කිව්වා.
සැබැවින්ම මයික් එක් පරම්පරාවක වීරයෙක්. ඔහුගේ ජයග්‍රහණය ලොවක් බලාපොරොත්තු වුණා.
වයස අවුරුදු 20 දී හෙවිවේට් ලෝක ශූරයා වීම කිසිසේත්ම පහසු ක්‍රියාවක් නොවෙයි.
ඒ සඳහා ඔහු කොපමණ වේදනාවන් තුළින් ගමන් කළා දැයි දන්නේ ඔහු පමණයි.
එවන් පුරාවෘත්තයක් මෙවැනි එක් තරගයකින් විනිශ්චය විය යුතු නැහැ.

ඉරේෂාන් සිරිවර්ධන